प्रतिनिधि सभाको बैठक १५ मिनेटका लागि स्थगित भएको छ । आईतवार बसेको प्रतिनिधि सभाको बैठकमा सांसदहरुले उठेर बिरोध जनाएपछि १५ मिनेटका लागि स्थगित गरिएको हो । बैठकको कारबाही अघि बढाउन लाग्दा सांसदहरुले उठेर बिरोध जनाएपछि सभामुख देवराज घिमिरेले बसेर संसदको कारबाही अघि बढाउन आग्रह गर्नुभयो । तर प्रमुख प्रतिपक्ष दल नेकपा (माओवादी केन्द्र), प्रतिपक्ष दल राष्ट्रिय स्वतन्त्र पार्टी, राष्ट्रिय प्रजातन्त्र पार्टी, नेकपा (एकीकृत समाजवादी) लगायतका प्रतिपक्षी दलहरुले उठेर बिरोध जनाए । सभामुख घिमिरेले चैत्र १३ गतेदेखि प्रतिनिधि सभाको बैठक अवरोध भइरहेको भन्दै बिरोध नजनाइ संसद सुचारु गर्न आग्रह गर्नुभयो । विद्युत प्राधिकरणका कार्यकारी निर्देशकबाट कुलमान घिसिङलाई हटाएको भन्दै प्रतिपक्षी दलहरुले संसद अवरोध गरिरहेको र मागअनुसार प्रधानमन्त्रीले आएर जवाफ दिनुपर्ने रहेको बताउनु भयो । सभालाई सुचारु गर्न र माग पूरा गर्न आफूहरुले निरन्तर प्रयास गरेको र १८ गतेको बैठकमा प्रधानमन्त्रीले जवाफ दिनुहुने सहमति जुटेको भन्दै सभा सञ्चालनका लागि आग्रह गर्नुभयो । बैठकमा प्रतिपक्ष दलहरुले उठेर बिरोध जनाइरहेपछि सभामुखले १५ मिनेटका लागि बैठक स्थगित गर्नुभएको छ ।
