राष्ट्रिय जनमोर्चाका अध्यक्ष चित्रबहादुर केसीले गणतन्त्र र लोकतन्त्रवादीहरुको निष्ठा र आचरणमा कमी आएकाले प्रतिगामी शक्तिको मनोबल बढेको बताउनुभएको छ । आईतवार संसद भवन बाहिर पत्रकारहरुसँग कुरा गर्दे उहाँले यस्तो बताउनुभएको हो । उहाँले तीनकुनेमा भएको घटना मुलुक प्रतिगमनतिर जाने अभियान भएको बताउनु भयो । उहाँले लोकतन्त्रवादीहरुको आचरण र व्यवहार हेरेर दुई वर्ष अघि नै गणतन्त्रमा खतरा हुनसक्ने बताएको जिकिर गर्नुभयो । उहाँले प्रतिपक्षहरुले प्रधानमन्त्रीको जवाफ माग गर्दै संसद अवरुद्ध गर्दा पनि प्रधानमन्त्री केपी शर्मा ओली संसदमा नआउनु गैरजिम्मेवार भएको आरोप लगाउनु भयो । वर्तमान प्रधानमन्त्री ओलीले विगतमा दुई पटक संसद विघटन गरेर मुलुकलाई प्रतिगमनतिर लैजान खोजेपनि पाँच दलीय गठबन्धनले रोक्न सफल भएको जिकिर गर्नुभयो । राजनीतिक दलका नेताहरु जुनसुकै मूल्य चुकाएर भएपनि पदको पछि लागेको उहाँको भनाइ छ ।
