धनगढी एफसीले नेपाल सुपर लिग (एनएसएल) को तेस्रो संस्करणको आफ्नो पहिलो खेलमा जित निकाल्दै सुखद् शुरुवात गरेको छ । त्रिपुरेश्वरस्थित दशरथ रंगशालामा दुई संस्करणका उपविजेता धनगढीले बुटवल लुम्बिनी एफसीलाई ४–१ ले हराउँदै सुखद् शुरुवात गरेको हो । धनगढीको जितमा अहमद हिजाजीले दुई, कृतीशरत्न छुन्जु र सर्जियो बारबोजुले समान एक गोल गरे । बुटवलका लागि भने केन्टा हाराले गोल गरेका हुन् । धनगढीले पहिलो खेलबाट तीन अंक जोड्दा बुटवलको दुई खेलबाट एक अंक छ । बुटवलले पहिलो खेलमा झापा एफसीसँग १–१ को बराबरी खेलेको थियो । खेलमा धनगढीले दुईपल्ट अग्रता लिएको थियो । धनगढीले खेलको छैटौं मिनेटमा नै अहमद हिजाजीको गोलबाट अग्रता लियो । मोहम्मत अल जेले मध्यभागबाट दिएको बललाई बुटवलका डिफेन्डरले क्लियर गर्न नसक्दा हिजाजीले नियन्त्रणमा लिँदै गोल गरेका हुन् ।
