युवराज खत्रीको उत्कृष्ट बलिङ प्रेरित नेपालले घरेलु मैदानमा जारी आइसिसी यु–१९ विश्वकप एसिया छनोटमा लगातार दोस्रो जित निकालेको छ । मुलपानी क्रिकेट मैदान (माथिल्लो) मा नेपालले सोमवार ओमानमाथि आठ विकेटको फराकिलो अन्तरले जित निकाल्दै छनोटमा दोस्रो जित निकालेका हो । जितसँगै नेपालले दुई खेलबाट चार अंक जोड्दै नेपाल दोस्रो स्थानमा छ । दुवै खेलमा पराजित ओमान अंकविहीन छ । नेपालले पहिलो खेलमा भने संयुक्त अरब इमिरेट्स (युएई) माथि डिएल मेथडका आधारमा पाँच रनले हराउँदै सुखद सुरुआत गरेको थियो । दोस्रो खेलमा पनि बलिङमा राम्रो साथ पाएपछि नेपालले जित निकाल्न सफल भयो । ओमानले भने पहिलो खेलमा अफगानिस्तानसँग हार व्यहोरेको थियो ।
